Meta 2016. Gipuzkoan proiektu kultural

1. Zer da Meta!?

Meta! Mikromezenasgoko bide bat da, talde-finantzazioa egiteko tresna berria, pertsona askoren arteko lankidetzan oinarrituta; pertsona horiek ekimen jakin baten garapenari laguntzeko diru-kopuru bat biltzeko, internetek eskaintzen dituen aukerak erabiltzen dituzte. Mikromezenasgoaren oinarria ez da eskatzea, aitzitik, proiektu baten inguruan dauden interes-taldeak parte hartzera bultzatzea eta horiei eragitea da; hala bada, finantzazioa lortzeko modu batetik harantz, harremanetan jartzeko eta lankidetzan aritzeko modu berria proposatzen du.

Deialdi honen bidez, hortaz, Gipuzkoan finkatutako eragileek garatzen dituzten ekimen berritzaileen sorrera bultzatu nahi da kulturaren esparruan, herritarren parte-hartzearekin. 

2. Nori zuzenduta dago deialdi hau?

Mikromezenasgoa bultzatzeko deialdi honetan, Gipuzkoako gizarte zibileko eragileek –partikularrek nahiz elkarteek– garatuko duten kultura-izaerako edozein proiektu aurkez daiteke. Bereziki baloratuko dira ekimen berritzaileak, gipuzkoar eragileen sorkuntza-ahalmenari eragiteko eduki nabarmena dutenak.  Era berean, parte hartu ahal izango dute gipuzkoar eragileek nazioarteko lankidetzaren esparruan garatutako kultura-izaerako ekimenek.

Kulturaren alorreko edozein ekimen, ekitaldi, programa, ekoizpen kultural, zerbitzu, teknologiaren garapen,… aurkeztu ahal izango da mikromezenasgoa bultzatzeko kanpaina honetan. 

Mikromezenasgoa bultzatzeko kanpaina Gipuzkoako gizarteari zuzenduta egonda, formatuaren bidez bilatu beharko da proiektua lurraldeko kultura- eta sorkuntza-beharrekin batzeko erarik onena, eta baita nazioarteko lankidetzako ekintzen barruan kulturaren esparruan esku hartzea ere. 

Deialdi honetatik kanpo geratuko dira enpresak, udalak eta bestelako administrazio-erakundeak, eta, halaber, Gipuzkoako Foru Aldundia partaide duten erakunde eta organismoak.  Mikromezenasgoa bultzatzeko kanpaina honetan parte hartzeak berekin dakar proiektua Gipuzkoako Foru Aldundiaren Kultura, Turismo, Gazteria eta Kirol Departamentuak antolatzen dituen bestelako laguntzak eta diru-laguntzak eskuratzeko deialdietara ezin aurkeztea. 

3.Nola aukeratzen dira proiektuak?

Meta! egitasmoan aurkezten diren proiektu guztien artean, 20 proiektu arte aukeratuko dira, fondoak bilatzeko kanpaina (mikromezenasgoa) egiten den fasera igarotzeko. Erakunde edo pertsona bakoitzak proiektu bat edo gehiago aurkeztu ahal izango ditu deialdira, baina bat bakarrik aukeratuko da. Proiektuetako bat gorde ahal izango da lankidetza-alorreko ekimen baterako.

Aukeraketa egiteko, kontuan hartuko da proposamenaren bideragarritasun orokorra eta proiektuak nola egokitzen diren mikromezenasgoak finantzatzeko bitarteko bezala eskaintzen dituen aukeretara, balorazio-irizpide hauen arabera:

• Zehazteko fasean egotea eta, aurrekontu koherenteaz gain, ekimena modu eraginkorrean garatzeko plan bat izatea. (2 PUNTU)

• Esperientzia eta gaitasun frogagarriak dituzten eragileek sustatuta egotea edo eragile horiek bertan parte hartzea, modu eraginkorrago eta erakargarriagoan hedatzeko, eta, proposatutako aholkularitzaz, komunikazio-plan bat garatu eta ezartzeko gaitasuna eta denbora izatea. Hori frogatzeko, komunikazio digitalaren hasierako deskribapen labur bat ipini beharko da Goteon, mikromezenasgoa bultzatzeko kanpainari begira, proiektuak inskribatzeko inprimakiak duen “Hedapena” atalean. (3 PUNTU)

• Proiektua zer kolektibo eta interes-talderi zuzenduta egongo den ondo identifikatuta egotea. (PUNTU 1)

• Interes-taldeentzat erakargarriak diren banakako sariak proposatzea eta talde-itzulketak sortzea, emaitzak erabili eta erreplika egitea ahalbidetzeko erabilera komuneko baliabideak eskura jarrita, kodea irekita eta lizentzia libreak erabilita. (PUNTU 2)

• Proposamenaren kalitatea eta originaltasun- nahiz berrikuntza-maila, egungo ezagutzaren, produktuen eta zerbitzuen eskaintzari dagokionean nahiz komunitatearentzat desiragarriak diren eta ingurunea eraldatzeko eragin positiboak sortzen dituzten balioak sustatzeari dagokionean. (3 PUNTU)

• Partaidetza-kudeaketa gardena, lankidetza-jardunbideak edota eragileen arteko lankidetza sustatzea. (PUNTU 1)

• Proiektua Gipuzkoan garatu eta burutzea, eta proiektuaren bidez Gipuzkoako kulturaren esparrua aberastu eta bertan elkarri lotzea, eta, halaber, Gipuzkoako ekosistema kulturalean sar daitezkeen kalitatezko eta sormenezko proiektu eta ekimenak dakartzaten eragile berrien agerpena sustatzea. (3 PUNTU)

Azkenik, deialdi honetako Ebaluazio Batzordeak beretzat gordeko du aukeratutako 20 proiektuen arteko plaza bat garapenerako lankidetza sustatzen duen proiektu bati emateko ahalmena. Lortutako puntuazioa kontuan hartu gabe gordeko da plaza, eta proiektuaren gaia kulturala izan beharko da, deialdi honetan lankidetzan aritzeko kultura-ekimenak sartzea errazteko helburuaz. 

4.  META! egitasmorako datak eta prozedurak

• Proposamenak jasotzeko epea: 2016ko apirilaren 27tik ekainaren 19ra arte, biak barne.

2016ko apirilaren 27tik ekainaren 19ra arte, biak barne, irekita egongo da proposamenak prestatu, horien inguruko aholkularitza eman eta bidaltzeko epea, geroago Meta! egitasmoaren barruan baloratzeko. Proposamenak aurkezteko, erabiltzaile bat sortu beharko da eta deialdi honetarako dagoen web orrialdean (https://goteo.org/call/meta-gipuzkoa) erabilgarri dagoen proiektuak jasotzeko inprimakia bete, http://goteo.org orrian erabiltzailearen profil bat erregistratu eta gero.

Komenigarria da inprimakia azken unean ez betetzea eta, aitzitik, proiektuaren edizio eta argitalpenean lanean aritzea pixkanaka, egin beharreko urratsak eginez eta eskuragarri dagoen tutoretza erabiliz.

Parte-hartzaileek gehienez ere bi proiektu aurkeztu ahal izango dituzte (hala ere, kanpainan sartzeko, proiektu bat aukeratuko da parte-hartzaile bakoitzeko), inprimakian dauden eremu guztiak bete beharko dituzte (izenburua, deskribapen laburra, aurrekontua, oinarrizko ezaugarriak, mikromezenasgoa bultzatzeko kanpainaren helburuak, eskaintzen diren banakako sariak eta taldeko itzulketak, eskatutako lankidetzak, lantaldearen aurretiazko esperientzia eta deskribapena, aurrekontua eta lan-egutegia, etab.), eta kasu guztietan, AZTERTZERA BIDALI (*) beharko da, proiektu bakoitza behar bezala baloratu ahal izateko, Meta! egitasmoaren izaera orokorrarekin duen kidetasunaren arabera eta oinarri arautzaile hauen 3.3. puntuan zehaztutako balorazio-irizpideen arabera.

Proiektuak aurkezteko epea 2016ko ekainaren 19an amaituko da, 23:59an, eta hortik aurrera ez da deialdi honetarako proposamen gehiagorik onartuko.

(*) Inprimakia AZTERTZERA BIDALTZEN ez bada, baliogabetzat hartuko da, eta ez da hautaketaren barruan sartuko deialdian.  

• Hedakuntza- eta prestakuntza-ekintzak

  : Maiatzaren 2, 10, 11 eta 31n eta ekainaren 1ean.

Proiektu bat aurkeztu eta proiektua hobetzen eta mikromezenasgora egokitzen lagundu nahi dutenei ahalik eta informazio gehiena emateko, hainbat hedakuntza- eta prestakuntza-ekintza antolatuko dira Meta! egitasmoaren esparruan:

• Maiatzaren 2an:Meta! ren  aurkezpen publikoa Goteo fundazio eta Gipuzkoako Foru Aldundiaren eskutik. 

• 2016ko maiatzaren 10ean eta 11n: Deialdia aurkeztu eta Meta! egitasmorako mikromezenasgoan prestakuntzaren inguruko lantegi praktikoa eskainiko da.

• 2016ko maiatzaren 31n eta ekainaren 1ean: Meta! egitasmorako mikromezenasgoan prestakuntzaren inguruko lantegi praktikoa.

Ekintza horiei buruzko informazio xehatua nahiz izen emateko eta parte hartzeko moduak web hauetan egongo dira eskuragarri: meta.gipuzkoa.eus eta https://goteo.org/call/meta-gipuzkoa

Ekintza horietako batean edo batzuetan parte hartzea ez da nahitaezkoa eta, hortaz, ez da ezinbesteko baldintzarik izango proiektu bat aurkezteko. Hala eta guztiz ere, lantegietan parte hartzea guztiz gomendagarria da Meta! egitasmorako proposamen bat aurkezteko interesa duten pertsonentzat, prozesuan dauden proiektuei buruzko saio praktikoak direlako, taldeko finantzazioaren eta talde-itzulketen zein beste gai batzuen gakoen, irizpideen eta ebaluazioaren oinarrizko alderdiak egiaztatu eta horien inguruan ikasteko. Prestakuntza-lantegi horietan parte hartuz gero, funtsezko hobekuntza lortuko da kanpaina-proposamenen bideragarritasunean, hori ezinbesteko irizpidea baita aukeratuko diren proposamenak hautatzeko.

• Proiektuen balorazioa eta hautaketa

  : 2016ko ekainaren 20 eta uztailaren 25aren bitartean

Behin deialdia egiteko epea itxi denean, epaimahai batek, berariaz ondorio honetarako eratuak eta Gipuzkoako Foru Aldundiko eta Goteo Fundazioko kideek osatuak, proiektuak ebaluatu eta hautatuko ditu. Epaimahaiak proiektuei buruzko informazio gehiago eskatu ahal izango du eta, halaber, beharrezkotzat jotzen badu, aholkularien laguntza eskatu ahal izango du, behar bezala baloratzeko berariazko ezagutza beharrezkoa duten gai jakin batzuetarako.

Gehienez ere 20 proiektu hautatuko dira, eta horietako bat nazioarteko lankidetzaren esparrukoa izan daiteke.

Hautatutako proiektuen sustatzaileei banaka eta posta elektronikoaren bidez egingo zaie jakinarazpena, eta proiektuen zerrenda osoa Meta! egitasmoaren web orrian eta Goteo.org webgunean argitaratuko da, 2016ko uztailaren 25a baino lehen.

• Aholkularitza hautatutako proiektuei

  : uztailaren 26 eta irailaren 14a bitartean.

2016ko uztailaren 26tik irailaren 14ra bitartean, biak barne, hautatutako proiektuen sustatzaileek online aholkularitza espezializatua eta banakakoa jasoko dute, proiektuak mikromezenasgoa bultzatzeko kanpainara egokitzen eta optimizatzen amaitzearren eta proiektu bakoitzaren helburuak maximizatzearren (itzulketak eta sariak, gutxieneko aurrekontua eta aurrekontu hoberena, bideoa eta irudiak,…). Halaber, komunikazio- eta marketin-plan bat behar bezala antolatzeko lan egingo da, kanpainen arrakasta-aukerak maximizatzearren.

• Meta! egitasmoko proiektuak ezagutzera ematea eta garatzea

  :  Irailaren 15ean

2016ko irailaren 15ean, hautatutako proiektuen mikromezenasgoa bultzatzeko kanpainak aldi berean ezagutzera emango dira; kanpaina horien bidez, proiektuen sustatzaileek, herritarrek, Gipuzkoako Foru Aldundiak, Goteok eta beste kolaboratzaile-eragile batzuek ahaleginak batuko dituzte aurretiaz finkatutako finantzazio-helburuak erdiesteko.

Proiektu bakoitzak elementu hauek izango ditu: aurkezteko berezko espazioa, albisteak eman eta eguneraketak egiteko bloga, 2.0 komunikazio-tresnak, ordainketa-pasabidea, etab. Kanpainaren epea irailaren 2016ko 15etik abenduaren 3ra artekoa izango da (biak barne), eta epe horren barruan ondorengoak sartuta daude: bi finantzazio-erronda, bakoitza 40 eguneko iraupenekoa, proiektuaren gutxieneko aurrekontuari eta aurrekontu hoberenari lotuta (alderdi honi buruzko informazio gehiago, oinarri arautzaile hauen 6.1. puntuan).

Mikromezenasgoa bultzatzeko kanpaina amaitu eta hurrengo 12 hilabeteetan, Goteok proiektu arrakastatsuen eta haien helburu eta konpromisoen jarraipena egingo du, parte hartzen duten eragileek eta kolaboratzaileek kasu bakoitzean ezarritako epeei jarraituz. 

5. Meta! egitasmoaren ureztatze-kapitala

Gipuzkoako proiektu kulturalen kanpainak 70.000 euro arteko ureztatze-kapitala duen poltsa bat du, herritarrek Goteo plataformaren bidez proiektuei ematen dizkieten banakako ekarpenak osatzeko.

Meta! egitasmoaren ureztatze-kapitala proiektuei esleituko zaie kanpaina egiteko denbora amaitutakoan, eta kanpaina arrakastatsua suertatu bada betiere, proportzio honetan: euro 1eko ureztatze-kapitala mikromezenasgoaren bidez bildutako euro bakoitzeko, eta gehienez ere 3.500 euroko ureztatze-kapitala banatuko da proiektu bakoitzeko, artikulu honen A eta D ataletan jasotako baldintzatzaileak betez.

Behean jasota daude 70.000 euroko ureztatze-kapitala aukeratutako proiektuen artean banatzeko baldintzak eta beste alderdi batzuk (mugak, kontratuak eta ordainketak):

• Gipuzkoako Foru Aldundiak jartzen duen Meta! egitasmoaren ureztatze-kapital osoa 70.000 eurokoa da gehienez.

• Ureztatze-kapitala bikoizteko ekarpena behin bakarrik egingo da pertsona edo erakunde eta proiektu bakoitzeko (hau da, Goteoko erabiltzailearen profil bakoitzetik). Profil beretik nahi adina ekarpen egin ahal izango zaio proiektu bati, baina ureztatze-kapitala erabiltzaile edota erakundeak egiten duen lehenengo ekarpenean soilik gehituko da, eta gehienez ere 100 euro arte.

• Goteon burutu diren gainerako crowfunding kanpainetan bezala, proiektu bakoitzari emandako ureztatze-kapitalaren kopurua azkenean eraginkor egiteko, proiektua bere gutxieneko finantzaziora iritsi behar da kanpainaren lehenengo 40 egunetan.

• Lehenengo 40 egunak igaro eta gero proiektu batek edo batzuek gutxieneko finantzazio-helburura iristea lortzen ez badute, proiektu horiek bildutako kopuruak ez dira eraginkor egingo eta ekarpenei lotutako ureztatze-kapitala erabilgarri geratuko da beste proiektu batzuetarako; proiektu horiek dirua biltzen jarraitu ahal izango dute hurrengo 40 egunetan, betiere lehenengo errondan finantzatzeko gutxieneko aurrekontua gainditu badute, eta kasu horretan bakarrik, proiektuko 3.500 euroko ureztatze-kapitalaren muga gainditu ahal izango dute.

Gipuzkoako Foru Aldundiak beretzat gordeko du aukeratutako proiektuen artean birbanatzen ez den ureztatze-kapital guztia kudeatzeko eskubidea.

1. Ureztatze-kapitalaren ordainketa eta herritarren dohaintzak batera egingo dira 2017ko urtarrilaren 31 baino lehen.

Goteoren funtzionamendu orokorrari jarraituz, 40 egun iraungo duen lehenengo finantzazio-errondan proiektua zehaztutako gutxieneko finantzazio-kopurura iristen ez bada, finantzatzaileek konprometitutako kopuruak ez dira kobratuko eta, hortaz, sustatzaileak ez du kopuru ekonomikorik bat ere jasoko; halaber, horren ondorioz, Gipuzkoako Foru Aldundiak konprometitutako ureztatze-kapitala ere ezin izango du jaso (ikus oinarri arautzaile hauen 5. puntua).

Lehenengo 40 egunen barruan gutxieneko aurrekontura arrakastaz iristea lortzen duten proiektuek kanpainaren bukaeran eta bi finantzazio-errondak egin eta gero jasotako ekarpenen diru guztia bilduko dute, ureztatze-kapitalaren zenbatekoa barne.

Halaber, kanpainak irauten duen 80 egun iragandakoan eta finantzatzaileei kobratzeko orduan gerta daitezkeen gorabeherak zehaztu eta konpondu ondoren, proiektu bakoitzaren sustatzaileari egingo zaio ordainketa, kanpainaren iraunaldian proiektuak jasotako ekarpen guztien izaera eta jatorria zehaztuta dauzkan txosten bat ematearekin batera.

Ordainketa bilketa-kanpaina bukatu eta gero egingo da, 2017ko urtarrilaren 31 baino lehen.

• Ordaintzeko prozedura eta Gipuzkoako Foru Aldundiaren ureztatze-kapitala duen kontu-sailaren arrazoitzea

Proiektu arrakastatsuek, ordainketa jaso baino lehen, kontratu bat sinatuko dute Goteo Fundazioarekin, eta bertan argituko dira baldintza guztiak eta parte hartzen duten alderdiek beren gain hartzen dituzten konpromisoak. Goteo Fundazioak proiektu arrakastatsuei bildutako kopuru osoaren % 4ko komisioa kobratuko die, plataformaren zerbitzuak, laguntza teknikoa, ordainketen eta kobrantzen kudeaketa, etab. erabiltzeagatik. Horri gehitu behar zaizkio transakzio ekonomikoen ondoriozko komisioak (bildutakoaren % 2 ingurukoa, ekarpen gehienak nola egiten diren, Paypalen bidez edo bestelako ordainketa-pasabideen bidez). Oso garrantzitsua da komisio horiek kontuan hartzea proiektuaren aurrekontua egiterakoan. Proiektua gutxieneko aurrekontura iristen ez bada, ez da komisiorik kobratuko, eta kanpainaren garapenak ez du kosterik izango sustatzaileentzat.

Lortutako kopuru osoa –Goteoren komisioari dagokion guztizkoaren % 4 eta herritarren mikromezenasgoaren ondoriozko banku-gastuak kendu eta gero– kanpaina hasi baino lehen proiektu bakoitzeko eman den banku-kontu batean ordainduko da.

Kanpainari lotutako gainerako zerbitzuak –mikrogune bat sortzea, 20 proiektuak barnean hartuko dituena; ekimena ezagutzera ematea eta hedatzea; hedatzeko ekintzak antolatzea; eta proiektu bakoitzari banakako aholkularitza ematea– Gipuzkoako Foru Aldundiak bere gain hartu eta Goteo Fundazioak eskainiko ditu.

6. Mikromezenasgoari eta Goteori buruz:

Gipuzkoako Foru Aldundiak Meta! garatzeko aukeratutako bidea mikromezenasgoa da, talde-finantzazioa egiteko tresna berria, pertsona askoren arteko lankidetzan oinarrituta; pertsona horiek ekimen jakin baten garapenari laguntzeko diru-kopuru bat biltzeko, internetek eskaintzen dituen aukerak erabiltzen dituzte. Mikromezenasgoaren oinarria ez da eskatzea, aitzitik, proiektu baten inguruan dauden interes-taldeak parte hartzera bultzatzea eta horiei eragitea da; hala bada, finantzazioa lortzeko modu batetik harantz, harremanetan jartzeko eta lankidetzan aritzeko modu berria proposatzen du.

Gipuzkoako Foru Aldundiak Meta! garatzeko aukeratutako bidea mikromezenasgoa da, talde-finantzazioa egiteko tresna berria, pertsona askoren arteko lankidetzan oinarrituta; pertsona horiek ekimen jakin baten garapenari laguntzeko diru-kopuru bat biltzeko, internetek eskaintzen dituen aukerak erabiltzen dituzte. Mikromezenasgoaren oinarria ez da eskatzea, aitzitik, proiektu baten inguruan dauden interes-taldeak parte hartzera bultzatzea eta horiei eragitea da; hala bada, finantzazioa lortzeko modu batetik harantz, harremanetan jartzeko eta lankidetzan aritzeko modu berria proposatzen du.

Hala bada, Goteo mikromezenasgoa erakartzeko plataforma da, pertsonek eta erakundeek gizartearen aldetik errentagarriak, jasangarriak eta denboran iraunkorrak diren proiektuak arrakastaz burutzeko. Gizartearen etengabeko hobekuntza lortzeko aukera berriak sortzen dituzten ekimenak, garatzen diren lekuetan aldaketa positiboak bultzatzera bideratuta, horiek sortzen edota hartzen dituen komunitatea indartzen laguntzen dutenak (gizarte-onura), eta ezinbestez ondare eta baliabide komunak aberasten laguntzen duen DNA irekia dutenak, era horretan ahalik eta pertsona- eta talde-kopuru handienak transferitu eta berrerabiltzeko aukera ziurtatuz (eta, ondorioz, guztien ongia sustatuz). Mikromezenasgoak oro har, eta Goteok bereziki, hainbat berezitasun dituzte, Meta! egitasmora aurkeztutako proiektuak modu eraginkorrean doitu ahal izateko kontuan hartu behar direnak. Jarraian, alderdi horietako batzuk labur azalduko ditugu.

• Gutxieneko aurrekontua eta aurrekontu hoberena

Proiektuaren aurrekontua finkatzeko orduan, banatu egin behar da, gutxieneko aurrekontua eta aurrekontu hoberena zehaztuz. Kanpainaren helburua gutxieneko aurrekontua gainditzea da; helburu horretara iristea lortzen denean, bilketaren gainerakoa sartu egingo da, nahiz eta aurrekonturik hoberenera ez iritsi. Gutxieneko aurrekontuaren barruan sartu behar dira funtsezko eta ezinbesteko atazak eta kontusailak (oso garrantzitsua da aurrekontuan jasotzea banakako sariak nahiz taldeko itzulketak sortu eta bidaltzeko gastuak, eta Goteoren komisio guztiei eta banku-transakzioei dagozkien % 6).

• Taldeko itzulketak: aske eta irekia dena sustatzea 

Goteotik, Meta! kanpaina antolatu duen plataformatik, kulturaren esparruko herritar-prozesuak hobetzearekin zerikusia duten ekimenak sustatzen dira, emaitzen gardentasunaren, transferentziaren eta berrerabilpenaren garrantzia nabarmentzen dira, eta era horretan, ondare komunen, ezagutza askearen eta kode irekiaren garapena bultzatzen da. Hau da, proiektu horiek, lizentzia libreen erabilpenari esker (adibidez: Creative Commons edo GPL –General Public License–), taldeko itzulketak eskain ditzakete komunitate osoarentzat, ezagutza partekatuz eta sarbidea emanez iturburu-kodeari, produktu eta baliabideei, prestakuntzari, finantzatzea lortu nahi duten jarduerarekin zerikusia duten artxibo eta edukiei, kopiatu, berrerabili eta berriz nahasi ahal izateko.

• Testu hau irakurtzea gomendatzen dugu, bertan adierazten baita zer esan nahi duen aske eta irekia izateak, eta soziala denarekin duen aldea (osagarria); esteka hau ere gomendatzen dugu, taldeko itzulketen adibide batzuk ezagutzeko. 

Proiektuen sustatzaileak talde-itzulketen egileak izan behar dira, eta itzulketa horiek lizentzia libre edo irekien bidez partekatuko dira. Egokiena den lizentzia aukeratzea (irekiagoa edo ez hain irekia) egilearen erabakia da, eta hirugarrenek (beste pertsona edo erakunde batzuek) erabiltzeari jarritako muga definituko da horrela.

Lizentzia irekiak dituzten proiektuak bereziki baloratuko badira ere, edozein motatako lizentzia duten proiektuak aurkez daitezke. Gipuzkoako Foru Aldundiak eta Goteok, kasu guztietan, proiektu bakoitzaren lizentziaren ezaugarriak osorik errespetatzeko konpromisoa hartuko dute.

• Banakako sariak

Talde-itzulketen osagarri moduan, proiektuek banakako sariak eskaini behar dituzte, proiektu bakoitza zuzenean finantzatzen duten pertsonei zuzenduta. Sari horiek emandako kopuruaren araberakoak izango dira, eta askotarikoak izan daitezke: eskertzeko hainbat modu eta proiektuari lotutako ikuspena, edo zerikusia duten eta osagarriak diren produktuak, zenbait sofistikazio-mailatakoak –emandako kopuruaren arabera–, eskaintzea besteak beste, edota merchandising, bisita teknikoak, hasierako aurkezpenetarako gonbidapenak, lantegiak, etab.

• Lankidetza banatua

Goteon ekarpen ekonomikoak egiteaz gain, proiektuei laguntzeko beste hainbat modu daude: mikroatazetatik hasi (itzultzaileak, tester delakoak, preskriptoreak) eta materialen maileguak (garraioa, ekipamenduak) edo azpiegiturak lagatzean (espazioak, instalazioak) bukatuta. Horregatik, proiektuetan argi eta garbi zehaztu behar da zer arlotan behar den lankidetza.

• Beste informazio garrantzitsu bat 

Mikromezenasgorako aurkeztuko den proiektua hobeto prestatzeko, material hauek kontsultatzea gomendatzen dugu:

• Entiende Goteo y el crowdfunding con un video de 17 minutos

• Decálogo para desarrollar un proyecto en Goteo

• Condiciones generales y Preguntas Más Frecuentes sobre Goteo

• Sobre el plan de comunicación y estrategia de difusión.

• Sobre el tipo de retornos y recompensas a ofrecer desde los proyectos.

• Sobre a qué nos referimos con libre y abierto y la diferencia (complementaria) con lo social.

• Algunos ejemplos de retornos colectivos.

• Ejemplos de proyectos exitosos.

7. Informazio gehiago eta harremana

Deialdiari, garapen-faseei eta proiektu motari buruzko informazio gehiago eskuratzeko, eta Meta! egitasmoaren gaineko beste argitasun eta kontu praktiko batzuk lortzeko, gurekin harremanetan jar zaitezke helbide hauetan:

• meta@gipuzkoa.eus

• meta@goteo.org

Oinarrietako PDFa jeitsi

Deialdiaren web orrialdea: http://goteo.org/call/meta-gipuzkoa

8. Xedapen nagusiak

Meta! egitasmorako deialdian parte hartzeko, Goteoren baldintza nagusiak onartu behar dira, eta oinarri hauek osorik eta baldintzarik gabe onartu behar ditu proiektu bakoitza sustatzen duenak; halaber, sinatutako kontratuen ondoriozko konpromiso guztiak onartu behar dira. Horrez gain, ziurtzat jotzen da aurkeztutako proiektuaren egilea eta titulartasuna bermatuta daudela eta beste inoren obraren jabetza intelektualaren eskubideak urratu ez direla.